公司客=好租客?                                                                                28/3/2018

 

作為業主既你當然想揀個好租客,可以準時交租又住得乾淨企理,咁揀租客時又有咩要注意? 今期話你知公司客又係咪一定好租客呢?

業主好多時以為搵到公司客就一定係好租客,但事實並非如此。公司客係指租客用公司名義簽約,當中有好有唔好,所謂好租客係視乎公司規模既大細。好多業主都希望大公司做租客,尤其上市公司同銀行,肯定有錢交租同最可靠。相反,細公司就會有呢個風險,一旦公司結業,業主就唔能夠輕易追討租金,尤其係有限公司。

當遇到租客要求用公司名義簽租約時,業主最好對公司做背景審查,睇下公司係咪可靠。如果係有限公司,公司係咪出名? 銀行或者上市公司信譽良好,當然無問題,但中小企有限公司,負責人承擔有限責任,公司一旦清盤,不再營運,業主就不能追討損失。因此,了解公司背景尤其重要。業主可以去公司註冊處進行公司查冊,睇下公司周年申報表(Annual Report)了解一下公司董事及股東。租客有無股份? 可唔可以代表到公司? 註冊地址係邊? 有無實體公司? 定係只有登記地址既空殼公司? 假如租客想用公司名義簽約,最好要求董事簽私人擔保,否則當遇上欠租,業主有可能投訴無門,所以除非係大型企業,否則都建議業主提議租客用個人名義簽約。

 

 

相關連結:

公司註冊處綜合資訊系統 https://www.icris.cr.gov.hk/csci/